સોલાર સિસ્ટમ લગાવવા માટે ચિંતા કરશો નહીં, આ બેંક આપશે ઓછા વ્યાજ દરે લોન, તમારૂ લાઈટ બિલ થઈ જશે ઝીરો

દેશની મોટી સરકારી બેંક પંજાબ નેશનલ બેંક (PNB) સોલર રૂફટોપ સ્કીમ માટે પોસાય તેવા દરે લોન ઓફર કરી રહી છે. બેંકે તેની વેબસાઈટ પર માહિતી આપી છે કે આ લોન લેવા માટે અરજદારનો CIBIL સ્કોર ઓછામાં ઓછો 680 હોવો જોઈએ. ઉપરાંત, આ લોન માટે અરજદાર પાસે પોતાની રહેણાંક મિલકત હોવી આવશ્યક છે. જેથી છત પર સોલાર સિસ્ટમ લગાવી શકાય. આ લોન માટે અરજદારની મહત્તમ ઉંમર 75 વર્ષ હોવી જોઈએ.

બેંકે કહ્યું છે કે આ લોન રહેણાંક મકાનમાં મહત્તમ 10 કિલોવોટની ક્ષમતાવાળી નવી રૂફટોપ સોલર પાવર સિસ્ટમ લગાવવા માટે આપવામાં આવી રહી છે. રૂફટોપ સોલાર પાવર સિસ્ટમની ક્ષમતાના આધારે લોનની મહત્તમ રકમ 6 લાખ છે.

વ્યાજ દર

3 કિલોવોટ સુધીની રૂફટોપ સોલાર પાવર સિસ્ટમ લગાવવા માટે 7 ટકાના વ્યાજ દરે લોન આપવામાં આવી રહી છે. આ લોન માટે મહત્તમ ચુકવણીની મુદત 10 વર્ષ છે. આ લોન લેવા માટે અરજદારને અરજી ફોર્મ અને મંજૂરી પત્ર, એક વર્ષનું ITR, છેલ્લા 6 મહિનાનું એકાઉન્ટ સ્ટેટમેન્ટ, વીજળીનું બિલ, મિલકત માલિકીના દસ્તાવેજની જરૂર પડશે.

પ્રધાનમંત્રી સૂર્ય ઘર મફત વીજળી યોજના માટે સબસિડી

આ યોજના હેઠળ, 2 થી 3 kW ક્ષમતા ધરાવતી સિસ્ટમ માટે વધારાની સિસ્ટમ ખર્ચ પર 40 ટકા સબસિડી આપવામાં આવે છે, જ્યારે 2 kW ક્ષમતા સુધીની સિસ્ટમ માટે, સોલાર એકમ ખર્ચના 60 ટકા આવરી લેવામાં આવે છે. સબસિડી પર 3 કિલોવોટ ક્ષમતાની મર્યાદા છે. વર્તમાન બેન્ચમાર્ક દરો મુજબ, 1 kW સિસ્ટમને 30,000 રૂપિયાની સબસિડી મળશે, 2 kW સિસ્ટમને 60,000 રૂપિયાની સબસિડી મળશે અને 3 kW કે તેથી વધુ સિસ્ટમને 78,000 રૂપિયાની સબસિડી મળશે.