8 લાખની સોપારી આપીને માતા-પિતાએ પોતાના જ પુત્રની કરી હત્યા, કારણ જાણીને ચોંકી જશો

તેલંગાણાના ખમ્મમમાં તેમના શરાબી પુત્રના જુલમથી કંટાળીને એક માતાપિતાએ તેની હત્યા કરાવી નાખી. મૃતક સાંઈ રામની ઉંમર 26 વર્ષની હતી. તેણે પોતાનો અભ્યાસ છોડી દીધો હતો. તે તેના માતા-પિતાનો એકમાત્ર પુત્ર હતો. તેના પિતા સરકારી શાળાના આચાર્ય છે. પુત્રની હત્યામાં પિતાની સાથે માતા પણ સામેલ હતી. બંનેએ આઠ લાખ રૂપિયામાં હત્યારાઓને રાખ્યા હતા. પોલીસે મૃતક ક્ષત્રિય રામ સિંહના પિતા અને માતા રાનીબાઈની ધરપકડ કરી છે. પાંચમાંથી ચાર હત્યારાઓને સાંઈ રામની હત્યા માટે ન્યાયિક કસ્ટડીમાં મોકલવામાં આવ્યા હતા. એક હજુ ફરાર છે.

વાસ્તવમાં પોલીસે જણાવ્યું કે હત્યારાઓએ સાઈ રામનું ગળું દબાવીને હત્યા કરી હતી. તેમનો મૃતદેહ 18 ઓક્ટોબરે સૂર્યપેટમાં ફેંકી દેવામાં આવ્યો હતો અને એક દિવસ પછી મળી આવ્યો હતો. ઘટનાના દિવસે (18 ઓક્ટોબર) આરોપી સત્યનારાયણ અને રવિ સાંઈ રામને તેની ફેમિલી કારમાં કાલેપલ્લીના એક મંદિરમાં લઈ ગયા અને અન્ય આરોપીઓને મળ્યા. ઇન્સ્પેક્ટર રેડ્ડીએ કહ્યું, “દરેક જણ નશામાં હતો અને નશામાં ધૂત થયા બાદ સાંઇ રામનું દોરડા વડે ગળું દબાવી દેવામાં આવ્યું હતું.”

પરિવારની કારે ખૂનનું રહસ્ય ખોલ્યું

સીસીટીવી ફૂટેજમાં ગુનામાં વપરાયેલી ફેમિલી કાર દેખાતી હતી. પોલીસે જણાવ્યું હતું કે સાઈ રામ છેલ્લે આ કારમાં જોવા મળ્યા હતા. પોલીસને જાણવા મળ્યું કે સાઈ રામના માતા-પિતાએ 25 ઓક્ટોબરે તેમના પુત્રના મૃતદેહને ઓળખવા માટે શબઘર જવા માટે આ જ કારનો ઉપયોગ કર્યો હતો. પોલીસે જણાવ્યું કે મૃતક સાંઈ રામના માતા-પિતાએ ક્યારેય ગુમ થવાની ફરિયાદ નોંધાવી ન હતી. આ દરમિયાન પોલીસની શંકા વધુ ઘેરી બની અને દંપતીની પૂછપરછ શરૂ કરી, જે બાદ બંનેએ પોતાનો ગુનો કબૂલી લીધો.

નશામાં ધૂત પુત્રના ત્રાસથી માતા-પિતા કંટાળી ગયા હતા

પોલીસે જણાવ્યું કે માતા-પિતા સાઈ રામને દારૂ માટે પૈસા આપતા ન હતાં જેના કારણે સાઈ રામ માતા-પિતા સાથે દુર્વ્યવહાર કરતો હતો અને મારપીટ કરતો હતો. પોલીસના જણાવ્યા અનુસાર, “તેઓએ તેને હૈદરાબાદના પુનર્વસન કેન્દ્રમાં મોકલ્યો, પરંતુ તેનાથી કોઈ ફાયદો થયો નહીં.” પુત્રની હત્યા માટે રામ સિંહ અને તેની પત્ની રાનીબાઈએ હત્યારાઓને 8 લાખ રૂપિયા અને એડવાન્સ તરીકે 1.5 લાખ રૂપિયા આપવાનું વચન આપ્યું હતું.

પુત્રની હત્યાની સોપારી મામાએ આપી હતી

હુઝુરાબાદ સર્કલ ઈન્સ્પેક્ટર રામ લિંગ રેડ્ડીના જણાવ્યા અનુસાર, દંપતીએ તેમના પુત્રને મારવા માટે રાણીબાઈના ભાઈ સત્યનારાયણની મદદ માંગી હતી. સત્યનારાયણે આર રવિ, ડી ધર્મ, પી નાગરાજુ, ડી સાઈ અને બી રામબાબુને હત્યા કરવા માટે સામેલ કર્યા. પોલીસે જણાવ્યું હતું કે દંપતીએ અગાઉ રૂ. 1.5 લાખ આપ્યા હતા અને હત્યાના ત્રણ દિવસ બાદ બાકીના રૂ. 6.5 લાખમાં સોદો નક્કી થયો હતો.