દક્ષિણ આફ્રિકાએ કેમ કહ્યું, કોરોનાના નવા વેરિઅન્ટ ઓમિક્રોનથી ડરવાની જરૂર નથી, જણાવ્યા આ 5 મોટા કારણો
કોરોનાના નવા વેરિઅન્ટ ઓમિક્રોને ગભરાટ ફેલાવવાનું શરૂ કર્યું છે. તેની શરૂઆત દક્ષિણ આફ્રિકાથી થઈ હતી. અહીયા પર જ આ પ્રકારનો પ્રથમ કેસ જોવા મળ્યો હતો. વિશ્વના ઘણા દેશોએ આંતરરાષ્ટ્રીય ફ્લાઇટ પર પ્રતિબંધ મૂક્યો છે, જેથી દક્ષિણ આફ્રિકાથી ઓમિક્રોન તેમના દેશમાં ન આવી શકે. જોકે આ બધાની વચ્ચે સાઉથ આફ્રિકાએ દુનિયાને એક સંદેશ આપ્યો છે. તેમણે કહ્યું કે ઓમિક્રોનથી ગભરાવાની જરૂર નથી. ધીરજ ધરો માત્ર સાવચેત રહો. મનમાં પ્રશ્ન તો આવતો જ હશે કે આખરે દુનિયા વેરિઅન્ટથી આટલી ડરે છે. 30 ગણી વધુ ઝડપે ફેલાય છે તો શા માટે દક્ષિણ આફ્રિકા તેના વિશે આટલી ઠંડી પ્રતિક્રિયા આપે છે? શા માટે કહે છે શાંત રહો?
હોસ્પિટલમાં દર્દીઓની સંખ્યા – મૃત્યુઆંક ઓછો છે
દક્ષિણ આફ્રિકાના ડોક્ટરોએ કહ્યું, એ વાત સાચી છે કે ઓમિક્રોનનો પહેલો કેસ દક્ષિણ આફ્રિકામાં જોવા મળ્યો હતો. પરંતુ તેના વિશે ચિંતા કરવાની જરૂર નથી. અહીં કેસ વધી રહ્યા છે, પરંતુ હોસ્પિટલમાં દાખલ થવાની સંખ્યા અને મૃત્યુઆંક ઓછો છે. દેશના ગૌટેંગ પ્રાંતમાં લગભગ 82% નવા કેસ નોંધાયા છે. વૈજ્ઞાનિકોએ કહ્યું કે નવા વેરિઅન્ટ પર કંઈપણ કહેવા માટે એકથી બે અઠવાડિયા લાગી શકે છે. દક્ષિણ આફ્રિકામાં એક દિવસમાં ઓમિક્રોનના 77 નવા પુષ્ટિ થયેલા કેસો સામે આવ્યા હતાં.
ઓમિક્રોનથી સૌથી વધુ કોને ચેપ લાગ્યો હતો
આ દેશના સ્વાસ્થ્ય વડાએ કહ્યું કે મોટાભાગના સંક્રમિત લોકો એવા છે જેને રસી નથી લાગી. તેઓ ભીડભાડવાળી જગ્યાએ રહે છે. એક અઠવાડિયા પહેલા કોરોનાના નવા પ્રકાર વિશે વિશ્વને માહિતી આપનાર દક્ષિણ આફ્રિકાએ કહ્યું કે એક અઠવાડિયા પહેલા સુધીમાં દેશમાં માત્ર 887 નવા કોવિડ કેસ અને 10 લોકોના મોત થયા હતા. પરંતુ હવે નવા કેસ લગભગ ચાર ગણા થઈ ગયા છે. પરંતુ મૃત્યુઆંક 10થી ઘટીને 8 પર આવી ગયો છે.
ઓમિક્રોનના દર્દીઓ 2 થી 3 દિવસમાં સાજા થઈ રહ્યા છે
દક્ષિણ આફ્રિકામાં ઓમિક્રોનથી સંક્રમિત દર્દીઓ વિશે એક સારી બાબત એ છે કે તેઓ બે થી ત્રણ દિવસમાં સ્વસ્થ થઈ રહ્યા છે. એટલું જ નહીં, તેમને હોસ્પિટલ લઈ જવાની જરૂર નથી. તેઓ ઘરે રહીને સ્વસ્થ થઈ રહ્યા છે.
ઓમિક્રોનથી હોસ્પિટલમાં દાખલ થવાનો કોઈ રેકોર્ડ નથી
દક્ષિણ આફ્રિકામાં લગભગ 82 ટકા નવા કેસ ગૌટેંગ પ્રાંતમાંથી આવ્યા છે, જેમાં પ્રિટોરિયા અને જોહાન્સબર્ગની રાજધાની અને નજીકની કેટલીક ટાઉનશિપનો સમાવેશ થાય છે. અહીં ખૂબ ગીચ વસ્તી છે. રસીકરણનો દર પણ ઓછો છે. અહીં ઓમિક્રોનથી હોસ્પિટલમાં દાખલ થવાનો કોઈ રેકોર્ડ નથી. છેલ્લા 24 કલાકમાં દક્ષિણ આફ્રિકાની હોસ્પિટલમાં માત્ર 30 નવા કોવિડ દર્દીઓ દાખલ થયા છે.
દક્ષિણ આફ્રિકાએ કહ્યું- ઓમિક્રોનથી ડરવાનું નથી
દક્ષિણ આફ્રિકા મેડિકલ એસોસિએશનના અધ્યક્ષ ડો. એન્જેલિક કોએત્ઝીએ કહ્યું કે આ ક્ષણે આપણે દક્ષિણ આફ્રિકામાં જે જોઈ રહ્યા છીએ તે ખૂબ જ હળવું છે. તેમણે કહ્યું કે ગભરાવાની જરૂર નથી. બે અઠવાડિયા પછી કદાચ કંઈક અલગ માહિતી આવશે. પરંતુ શરૂઆતના લક્ષણોમાં આટલી ચિંતા કરવાની જરૂર નથી. ડોક્ટર કોએત્ઝીએ એ પણ જણાવ્યું કે ઓમિક્રોનના દર્દીઓ ઘરે છે. તેઓ બે-ત્રણ દિવસમાં સ્વસ્થ થઈ રહ્યા છે.
હવે દર્દીઓ પર નજર રાખો, પરિણામ 2 અઠવાડિયામાં આવશે
આફ્રિકા ટાસ્ક ફોર્સ કોરોના વાયરસના એક સલાહકાર પ્રોફેસર સલીમ કરીમે કહ્યું, “અમે અત્યારે નવા પ્રકાર વિશે કંઈપણ કહેવાની સ્થિતિમાં નથી.” હા, એવું લાગે છે કે આપણે ચોથી લહેર તરફ આગળ વધી રહ્યા છીએ. લગભગ બે અઠવાડિયા પછી કેટલાક પરિણામો બહાર આવી શકે છે. ત્યાં સુધી વધતા કેસ પર નજર રાખવી જોઈએ, એ જ અમે કરી રહ્યા છીએ.
