સસ્તા ભાવે મળશે સોનું, સરકાર સોમવારથી બજાર કરતા ઓછા ભાવમાં શરૂ કરશે સોનાનું વેચાણ
જો તમે રોકાણ કરવા માટે સોનું ખરીદવા જઈ રહ્યા છો, તો તમને ડબલ ફાયદો મળી શકે છે. સોમવારથી ભારત સરકાર તમને સોનામાં રોકાણ માટે ખાસ તક આપશે. તેમાં તમને 62,000 રૂપિયા પ્રતિ 10 ગ્રામની નીચેના ભાવે સોનું મળશે. તેની સાથે તમને વ્યાજ પણ મળશે.
સરકાર દ્વારા સોવરિન ગોલ્ડ બોન્ડનું વેચાણ સોમવારથી શરૂ થશે. રિઝર્વ બેંક ઓફ ઈન્ડિયા 18 ડિસેમ્બરથી સોવરિન ગોલ્ડ બોન્ડ સિરીઝ-3નું વેચાણ શરૂ કરશે. તેના માટે એક ગ્રામ સોનાના ભાવ જાહેર કરવામાં આવ્યા છે. સાથે જ ડિજિટલ પેમેન્ટ કરનારા લોકોને એક ગ્રામ દીઠ 50 રૂપિયાનું ડિસ્કાઉન્ટ મળશે.
હાલમાં સોનાના ભાવ બુલિયન માર્કેટમાં 64,000 રૂપિયા સુધી થયા છે. પરંતુ સોવરિન ગોલ્ડ બોન્ડ માટે RBI એ એક ગ્રામ સોનાના ભાવ 6,199 રૂપિયા નક્કી કર્યા છે. આ ભાવ મૂજબ સોનાના 10 ગ્રામના ભાવ 62,000 રૂપિયા કરતા ઓછા છે.
જો તમે ડિજિટલ પેમેન્ટ દ્વારા ગોલ્ડ બોન્ડ ખરીદો છો, તો સોનાના ભાવ 50 રૂપિયાના ડિસ્કાઉન્ટ બાદ 6,149 રૂપિયા થશે. આરબીઆઈ દ્વારા જાહેર કરાયેલ ગોલ્ડ બોન્ડ 24 કેરેટ સોનાના ભાવ મૂજબ છે. તમે તેને પેપર ગોલ્ડ પણ કહી શકો છો.
સોનાને બદલે ગોલ્ડ બોન્ડમાં રોકાણ કરવાથી ડબલ પ્રોફિટ મળે છે. 8 વર્ષ બાદ તમને મેચ્યોરિટી સમયે તમને જે બજાર ભાવ ચાલતા હશે તે પ્રમાણે રિટર્ન મળશે. સાથે જ સરકાર તરફથી દર વર્ષે 2.5 ટકા વ્યાજ પણ આપવામાં આવે છે. આ ઉપરાંત ગોલ્ડ બોન્ડની ખરીદી પર GST ચૂકવવો પડતો નથી.
