48 કલાકમાં 315 બાળકોનું અપહરણ, હોસ્ટેલમાં સૂતેલા માસૂમ બાળક પર અત્યાચાર, બંદૂકધારીઓએ સર્જી અરાજકતા, અત્યાર સુધીમાં 1400 બાળકો બન્યા છે શિકાર
શનિવારની વહેલી સવારે ઉત્તર-પશ્ચિમ નાઈજીરીયામાં એક હોસ્ટેલમાંથી સશસ્ત્ર માણસોએ 15 બાળકોનું અપહરણ કર્યું હતું. ઘટના સમયે બાળકો હોસ્ટેલમાં સૂતા હતા. પોલીસે આ માહિતી આપી હતી. આના માત્ર 48 કલાક પહેલા બંદૂકધારીઓએ એક શાળામાંથી ઓછામાં ઓછા 300 બાળકોનું અપહરણ કર્યું હતું. નાઈજીરીયાના ઉત્તરીય વિસ્તારમાં શાળાઓમાંથી બાળકોના અપહરણની ઘટનાઓ વધી રહી છે. 2014 માં, ઇસ્લામિક ઉગ્રવાદીઓએ બોર્નો રાજ્યના ચિબોક ગામમાંથી 200 થી વધુ શાળાની છોકરીઓનું અપહરણ કર્યું હતું અને આ ઘટનાએ સમગ્ર વિશ્વને ચોંકાવી દીધું હતું.
સશસ્ત્ર ટોળકી ખંડણી માટે શાળાના વિદ્યાર્થીઓને નિશાન બનાવવાનું ચાલુ રાખે છે અને અનેક ઘટનાઓમાં અત્યાર સુધીમાં ઓછામાં ઓછા 1,400 બાળકોનું અપહરણ કરવામાં આવ્યું છે. સોકોટો પોલીસના પ્રવક્તા અહેમદ રુફાઈએ એસોસિએટેડ પ્રેસને જણાવ્યું હતું કે બંદૂકધારીઓએ સોકોટો રાજ્યના ગિદાન બકુસો ગામમાં સ્થાનિક સમય અનુસાર લગભગ 1 વાગ્યે હુમલો કર્યો અને પછી એક ઈસ્લામિક શાળામાં ગયા.
ત્યાંથી તેઓએ બાળકોનું અપહરણ કર્યું હતું. તેણે કહ્યું કે બંદૂકધારીઓએ ગામની એક મહિલાનું પણ અપહરણ કર્યું હતું. પોલીસ અપહરણ કરાયેલા લોકોને શોધી રહી છે. હજુ સુધી કોઈ જૂથે આ ઘટનાની જવાબદારી લીધી નથી. નાઈજીરીયાના ઉપરાષ્ટ્રપતિ કાસીમ શેટ્ટીમાએ કડુનામાં અધિકારીઓ અને અપહરણ કરાયેલા વિદ્યાર્થીઓના કેટલાક માતા-પિતા સાથે મુલાકાત કરી અને તેમને બાળકોના સુરક્ષિત પરત આવવાની ખાતરી આપી.
